الترطيب الكامل ♥♥.

اهلاً بنات .

شخباركم ؟

إن شاءالله تكون إجازة سعيدة عليكم ، أولاً شكراً أروى على هذي الصورة الله يعطيها العافية ساعدتني كثير ، هذا حسابها في الأنستقرام لو حابين تشوفون تصويرها ،قررت انزل هالتدوينة اللي كنت ابنزلها من الشتاء ! بس ماادي وش يصير ولا أنزلها أعتذر عن التقصير اللي صاير بحق المدونة بس انشغلت و كنت احاول قد مااقدر اني انزل تدوينات ، عموماً تدوينة اليوم راح تكون طويلة لاني ابحاول قد مااقدر أنكم تستفيدون من التدوينة هذي ، التدوينة تتكلم عن الترطيب بشكل عام للجسم او البشرة او اليدين واتعمدت احط المنتجات هذولي لانها ممكن تحصلينه وممتازه وتقريباً موجودة ومتوفرة وانا مقرره بعد إني مااشتري ولا منتج لمين أخلص اللي عندي ، بالنسبة للشعر كتبت له تدوينة كاملة (العناية الكاملة بالشعر ♥♥ .) ، ايوه صح اغلب الاوقات اكون موجودة في السناب والآسك والانستقرام والتويتر راح احط لكم الحسابات تحت . 

طيب فيه نقاط اساسية لازم تعرفينه عشان ممكن تحافظين على الترطيب :

- النقطة الأولى شرب المويا ، المويا له تأثير كبير على البشرى سواءً كان داخلياً او خارجياً وأحياناً تصادفنا مشاكل ولو نكشف عن أسبابه هي قلة شرب المويا اشياء كثييرة ممكن تصير لنا وحله بسيط وو شرب المويا مثلا : الهالات السوادء ، اسمرار المفاصل والركب والاكوع ، بهتان البشرة والشعر ، مشاكل الكلى ، آلام المعدة ، جفاف الجسم والشعر وخشونة اليدين والرجلين ، عدم سيلان الدم من الداخل أشياء كثيرة لو ننتبه له يكون سببه الأساسي قلة شرب المويا ، طيب بالبداية راح يكون صعب عليك لأنك ماتعودتي حاولي تشجعين نفسك شوي شوي ، ابدأي مثلاً ب كوبين وبعده زودي كوبين لين توصلين ثمان اكواب يومياً لانه مره مهم تبدأين بترطيب جسمك داخلياً .

ملخص النقطة الأولى - شرب ثمان اكوب مويا- 

- النقطة الثانية سواءً  كنا في الشتاء او الصيف غلط اننا نستحم بمويا حارة لان المويا الحارة تسبب الجفاف للبشرة وتعرضنا لمشاكل كثيرة ، اولاً : إذا استحميتي بمويا حارة راح يتأثر جلدك وبشرتك ، واساساً الماء الحار يفتح المسام ف راح يتأثر وينفتح المسام والمويا فيه كلور فيدخل داخل المسامات والبروتينات والدهون الطبيعية اللي على الجلد راح تروح وتعطي الجلد مظهر جاف ومتشقق ، ويزيد من إتلاف الطبقات الداخلية للبشرة وتساعد على أنها تتضرر ، ممكن يسبب بهتان للبشرة وجفاف وتساعد الشعر على أنه يتساقط ، واذا استحميتي  او تسبحتي بالمويا الحارة يساعد جسمك على الخمول والكسل بعكس اذا استحميتي بمويا بارده او فاترة ، وحاولي قبل ماتطلعين من الحمام اخر شيء رشي على جسمك مويا بارده عشان يتسكر كل المسام المفتوحة على جسمك .

مخلص النقطة الثانية - تستحمين او تتسبحين بمويا فاترة او باردة - .

- النقطة الثالثة حاولي تكونين متعاونه مع نفسك على الترطيب سواءً ترطيب البشرة او الشفايف او الجسم او يديك او رجولك 

حاولي قد ماتقدرين ترطبينهم خليها عادة بيومك ،الحين انا ابعدت عن المويا الحارة تمام ؟ وشربت ثمان اكواب مويا ، بإذن الله بعد هذولي والترطيب (اي كريم مرطب مناسب لك على بشرتك) راح تشوفي اغلب المشاكل انحلت ، طيب اغلبنا يتكاسل عن الشيء هذا اول شيء شجعي  نفسك إذا كنت ابي مثلاً يدي تكون مترطبة وناعمة ماراح تكون كذا على طول لازم تستمرين عشان تضمنين النتيجه فحاولي قد ماتقدرين أنك ترطبين لأن الترطيب مهم وبقوه بعد ، اول شيء حاولي بعد كل وضوء رطبي جسمك تمام ؟ بإذن الله راح تتعودين عليه ويكون جزء من يومك .

ملخص النقطة الثالثة - الترطيب - .

وبسم الله ونبدأ تدوينتنا : 

- أول شيء ترطيب البشرة : 

  

هو كريم  Hydra-Total 5 من لوريال .

انا بشرتي مختلطة ولي فترة ادور كريمات للبشرة المختلطة وتكون ممتازة ولاتحسس وجهي ف لقيت هذا الكريم  تقريبا أساسه جل ، كذا قومه ثقيل ، واغلبه مويا يعني تمتصه البشرة ،ولاتحسينه يكتم او يثقل على وجهك، وينعش وجهك ، ترطيبه كويس بس ماتحسينه يطول على بشرتك ممكن تستخدمينه مرتين في اليوم ممتاز وفيه نسبة عطر ، لو كانت بشتك حساسة ابعدي عنه .

سعرة 35 من النهدي .

ثاني منتج بخاخ فيتامين سي من بودي شوب : 

أتوقع طفشتكم فيه ،فوائد الفيتامين سي كثيرة ومهمه للبشرة ..

اذا وجهك باهت يعطي حيويه ولمعه حلوه للوجه ،انا استخدمه قبل ما انام وقبل ما اروح الدوام ، وممكن تدخلينه من ضمن عنايتك لبشرتك اتوقع بيفيدك كثير استخدميه استخدامات فكس بلس اتوقع يعتبر كبديل له، مثبت ميك اب ، يعطي دوي لوك ،يعطيك شعور منعش ،بخي على الفرشة اللي بتستخدمين فيها الشدور بتلاحظي انه اللون صار قوي .

سعره مااذكره بالضبط بس تقريبا 69 ريال

ثاني منتج سيروم فيتامين سي من بودي شوب :

• سيروم جمييل  ، ما استغني عنه أبد احسه مهم وضروري يكون عندك ، يفيد البشره ويعطيها نضاره  ، ويعطي الوجه ملمس مخملي وناعم  ، انا استخدمه مرتين في اليوم وأدخله من ضمن الروتين عندي  ، وممكن استخدمه قبل الميك اب كبرايمر  ، وممكن بعد الميك اب تحطي نقطه صغيره ع الوجه لانه يقلل من ظهور المسامات ويعطي نعومة للوجه تقريبا زي برايمر بروفشينال من بنفيت .

• 
  

- وبالنسبة للشفايف :

مقشر الشفايف من elf : 

وشركة elf معروفة بجودة منتجاته ومن المنتجات المشهوره عندهم مقشر الشفايف :

يجي على شكل روج وهذا افضل شيء ، طريقة استخدامه : بللي شفايفك بمويا وبعده حاولي تحركين المقشر بحركات دائرية وشوي شوي لانه اذا حركتيه بقوه ممكن تتجرح شفايفك ، المنتج ممتاز قوه ، يتكون من زيوت الطبيعيه والسكر البني بحيث لو قشرتي شفايفك تكون  ناعمه ومترطبة يعني ماتعطيك الجفاف اللي بعد التقشيرولنتيجه تكون شفايف وردية وناعمه ومترطبة .

 -احرصي على انك ترطبين شفايفك بعد التقشير- .

- اعتذر عن شكل المقشر لانه طاح مني قبل فتره واضطرت اشيل جزء منه -.

اشتريته ب 35 ريال . 

بعد المقشر على طول استخدم ليب ثيربي من فازلين للشفايف :

ليب ثيربي من فازلين هو معالج للشفايف التعبانه والمتشققه والجافه ، الشفايف تمتصه بسرعه ويبقى زي اللون الوردي الناعم عليه ، يوعد المنتج ان الشفايف راح تكون ورديه وناعمه ومترطبه ومافيها تشققات ، انا قبل كنت احط فازلين العادي واقوم القى فيه زي الطبقه على شفايفي وتتقشر ! ماعجبني الوضع فجربت الفازلين هذا وصراحة نتايجه كويسه وجميله ،الشفايف اللي كانت قبل تعبانه وجافه راحت صارت ورديه وناعمه ومترطبه ، بس اهم شيء مع الترطيب ضروري تكثري مويا لان الجسم بحاجه للترطيب الداخلي قبل الخارجي كثري مويا وكذا، بالنسبه للفازلين هو بنكهة الروز ، الريحه تجنن ، بالنسبة للترطب ترطيبة ثقيل شوي يعني تحسين شفايفك لينه ومترطبة كويس ، والقوام خفيف بالنسبه للفازلين هو اخف شوي ، لونه وردي خفيف ، وحجمه صغيير .

سعره : 25 ريال . 

او ممكن تستخدمين مرطب الشفايف من QV اتوقع مافيه احد مايعرف او مايسمع عن الشركة ، المرطب قوامه ثقيل لكن مو اللي يدبق وتحسين فيه شيء مزعج على الشفايف لا ! ، فيه SPF 30 ، ترطيبه عالي وكويس وينفع للشفايف الجافه ومره ممتازه له ، مافيه عطور وهذا شيء كويس ، لونه ابيض بس لما يتوزع يكون شفاف على الشفايف ،  بس  برضوا اهم شيء مع الترطيب ضروري تكثري مويا لان الجسم بحاجه للترطيب الداخلي قبل الخارجي كثري مويا وكذا، بالنسبة للترطب ترطيبة ثقيل شوي يعني تحسين شفايفك لينه ومترطبة كويس .

سعره من 16-23 ريال .

- خلصنا من الشفايف جاء دو الرموش والحواجب طيب الحواجب والرموش له دور من ضمن الروتين ابقولكم كذا خطوة مهمه :

الرموش اغلبنا يشتكي من انه تطيح كثير والحواجب فيه بعضهم يطيح وفيه يشتكون من خفة حواجبهم ويبغون شيء يكثفها والرموش نفس الحكاية فجبت لكم خطوة جميلة تنفعكم وتستفيدون منه كثير :

 مثل ماانتم شايفين بالصورة فيه جل الحواجب من h&m اغلبنا عنده المنتج هذا ، لو مخلص عندك وموعارفة ايش تسوين فيه نظفيه وعقميه بمويا حارة بعدين حطي فيه اي زيت يفيد الرموش والحواجب سواءً كان الخروع او جوز هند اوغيره ، وغير كذا فرشته مره سهله وعملية بالنسبة للمنتج يعني كفيلة بإنها توزع لك الزيت كويس وتسمح للرموش والحواجب تستفيد منه كثير .

استخدميه قبل النوم وزعيه على الرموش والحواجب .

- جبت لكم تدوينة جميلة عن الرموش من مدونة كِريستال - سلام فرح :$ ♥♥ - ممكن تستفيدون منه كثير :-  

(  رموش صحية كثيفة وطويلة  بطرق بسيطة  ) 

نجي الحين لترطيب الاظافر واللي حولينه : 

اغلبنا يشتكي من الجفاف اللي حولين الاظافر والاظافر اللي تتكسر ولا تطول والاظافر اللي تتكسر بسرعه وضعيفة قوه !

برضوا الاظافر له عدة اشياء مهمه انتبهي له : 

- سبب الجفاف سواء كان بأي منطقة هو الماء لازم تكثري من الماء !

- مبرد الاظافر لاتستخدمينه الا مره او مرتين بالشهر لانه يساعد على انه يخلي الاظافر تتكسر بسرعه .

-  لو اظافرك تتكسر بشكل ملحوظ ويأثر عليها اي شيء  خوذي تحليل دم وشوفي ايش اللي ناقصك من فيتامينات وغيره  واحرصي انك تاخذين فيتامينات او مكملات غذائية تكون ممتازة للشعر والاظافر مثل "هيردال ، SEVEN SEAS " وبشرط يكون ب استشارة اخصائية تتغذية .

- الترطيب وراح اوريكم كم منتج ممكن انتي تسوينه بالبيت او تشترينه جاهز .

قبل فترة شفت عندهم مجموعة العناية بالاظافر ، يحتوي المنتج على ثلاث منتجات ، فيه مقشر ، ومنتج يزيل الجلد الميت او شيء زي كذا وفيه زيت الترطيب بجوز الهند .

للأمانه انا مااستخدمت الا الزيت بس لأني كنت بحاجته ف استخدمته والباقي لا فقلت ابجرب ابحث عنهم واشوف .

عندنا المنتج الأول زيت جوز الهند من H&M 

الزيت علبته فيه روله تدور وتوزع المنتج بشكل سريع ولطيف وبمجرد ماتوزعينه  حولين الاظافر سوي مساج شوي عشان يقدر  يتشربه او يمتصه بسهوله . 

ترطيبه ممتاز وكويس وتحسينه لين وطري ف اقل شيء تستخدمينه قبل النوم ،  ممتاز مره انصح فيه وخاصةً انه فيه جوز الهند ، وزيت جوز الهند معروف ترطيبه القوي والممتاز للجفاف ! 

سعره : 30 ريال .

فيه طريقه ثانيه ممكن تستخدمين زيوت طبيعيه ومتوفره عندك بالبيت مثل زيت الزيتون وزيت اللوز الحلو ! مره ممتازين ، يقوون الاظافر وتطول بسرعه برضوا ولا تتكسر بسهوله ! الطريقه هي انك تجيبين علبه مناكير مثلا مخلصه او قديمه عندك انا عندي هذي العلبه من مجموعه بس انتهت صلاحيتها وانا ماخلصتها فاستخدمته او اي علبه له ريشه زي ريشه المناكير نظفيها وعقميها وحطي اي زيت يعجبك فيها واستخدميه قبل النوم وزعيه على الظفر وحول الظفر وسوي مساج له عشان تتشربه اكثر واكثر . 

- وبالنسبة للجسم :

فيه الفازلين : 

وحنا عارفين الفازلين يعني غني عن التعريف طبعاً ممكن تستخدمينه للاظافر مره ممتاز وانا مجربته قبل كنت احطه على اظافري واسوي مساج عشان تتشرب بسرعه ، النتيجه : اظافر قويه والتكسر صار اقل او خف بكثيير .

ممكن تستخدمينه للترطيب خاصة بالوقت هذا ، سواءً للجسم بعد  واليدين والاظافر وممكن للرجلين بعد التقشير  وفيه بعضهم يستخدمه مع زيت الخروع للحواجب والرموش والفازلين مره ممتاز للحالات هذي والافضل تستخدمينه قبل النوم عشان يكون عنده وقت طويل ويقدر الجسم يتشربه ، انا اغلب الكريمات اللي عندي او اللي عارضته لكم الحين كنت مااستخدمه قبل فقررت استخدمه الحين بما انه شتاء وكذا ويحتاج الشتاء للترطيب القوي قررت اني مااشتري لين اخلص اللي عندي بديت استخدم شيء بسيط ومتوفر واعرفه قبل وضامنه نتيجته يعني مجربته اكثر من مره مو جديد ويبي له تجربه . 

ومن المنتجات المشهوره ملح اليوكو الياباني : 

احسه غني عن التعريف ! عموماً هو مقشر يشيل الجلد الميت ، يعطي نضارة ونعومة جميله  ،  يعطي تفتيح للبشرة ، غني بعدة فيتامينات  ومنه هـ ، يعمل على ترطيب البشرة وتغذيتها بشكل ممتاز  طريقة استخدامه انك تبللين جسمك بمويا او وجهك او يدك وتاخذين شوي منه وتفركين شوي شوي على جلدك لين مايذوب شوي بعد ماتغسلينه بتحسين جلدك ناعم وتحسين بنظافته ! فيه منه عدة أشكال زي اللي في الصورة ، فيه بالحليب ، وبالروز بيري والبلو بيري ، فيه بالأفوكادو ، وفيه عدة أشكال منه ! 

سعرة 12 ريال .

وفيه مقشر فرانك اشتهر بالفترة الأخيرة :
عبارة عن مقشر بالقهوه وزيت اللوز الحلو ، زيت البرتقال ، ملح ، سكر بني ، زيت فيتامين e .

طريقته انه تبللين جسمك بمويا ولاتستخدمين معه ليفه لانه خشن شوي فخوذي منه شوي كافي ووزعيه على  جسمك بالطبطبه عشان يمسكه جسمك بعدين افركيه بحركات دائرية وبشوي شوي ، بس بعد ماتوزعينه  اتركيه ينشف من 5 إلى 10 دقايق بعدين اغسليه ! النتايج مره ممتاز لو كان عندك اثر في يدك او بمكان بجسمك ممكن يتحسن ويخف ، النعومه والترطيب يعني حسيت جسمي مترطب حطيت مرطب تمتصة البشرة كويسة ، مهمته ان المقشر يشيل الجلد الميت ويخفف من الستريش مارك والسليوليت والاكزيما والصدفيه وحب الشباب والآثار اللي بالجسم فلو كان عندك احد من هذولي المشاكل ممكن تستمرين عليه لانه فيه فرق بالنتايج ! 

- وبالنسبة للشعر :

ماسك : hello hair  للشعر 

طبعاً سويت تدوينة كاملة عن الشعر لو حابين تشوفونه(العناية الكاملة بالشعر ♥♥.)

الماسك هذا اشتهر بالفترة الأخيرة وسمعت عنه مدح كثير فـ قررت اجربة ممكن تطلبينه من المتاجر او من الأمازون وغيره .

بما ان شعري فروته دهنيه واطرافة جافة خفت استعمله على الفروة لأنه ممكن يسدد المسام بما انه يدهن زيادة يعني وممكن يسبب تساقط برضوا ! سمعت انه يخلي الشعر مترطب بطريقة جميلة فتجنبت اني احطه عن الفروة .

قوامه ثقيل يذوب مع الحرارة مكون من مواد طبيعية : زيت الارقان ، زيت اللوز ، زيت جوز الهند ، زيت الزيتون ، زيت الخروع وغيره ن الزيوت .

طريقة استعماله : تستخدمينه على شعر جاف ونظيف يعني بعد ماتستحمين ويصير شعرك جاف ، او من بكره استخدميه ، خوذي منه كمية قليله ووزعيه على شعرك من الاطراف وسوي مساج واتركيه لمده نص ساعه او أكثر ، لأنه كل ماكان أكثر صار أحسن وأحسن  ،ولو تغطين شعرك بمنشفه احسن واحسن بعد  ، صراحة ً جمييل بمعنى الكلمة ! ممن يكفيك على حسب طول شعرك انا شعري لنص الظهر فـ كفاني 5 استعمالات ! ،  مره بالاسبوع اعتقد كافي ، بعجه يكون الشعر مترطب وناعم وريحته حلوه ، ويقلل من تكسر الشعر والتقصف ، يعطي اللمعه الصحيه للشعر مره ممتاز وانصح فيه .

سعره : بحدود الـ 80 ريال ! 

وفيه حمام الزيت فاشكول للشعر :

قوامه كريمي شوي ، مره فرق بالأستخدام جميل جداً ، يعطي ترطيب ويكون ناعم متغذي واللمعة الجمييلة ، يخفف التكسر والتقصف ! وفوق كل هذا ريحته جميلة طريقته :بعدما انشف شعري ويكون رطب أخذ كمية مناسبة من الماسك و أوزعها على كل شعري طبعا اركز على الأطراف لإنها أكثرعرضة للجفاف والتقصف والتكسر ، و أتركه من 3-5 دقائق ، و أغسله، اعتقد ان مره او مرتين في الشهر  كافي !

مع الأسف مااتذكر سعره والله ): .

وفيه سيروم كريستال للشعر :

غني عن التعريف من كثر مو انه معروف ، سيروم يستخدم بعد الاستشوار يعطي ترطيب ونعومة ولمعة للشعر ، لو تستخدمينه بعد الشاور ضغطه وحده منه تكفي وزيادة بعد ! ، لو كثرتي منه راح يدهن الشعر لان قوامه ثقيل ،يخفف النفشة ويعطي ترطيب برضوا ، ويخفف التقصف .

السعر والمكان : نزيه ، من 20 إلى 30 تقريباَ .

- طيب وصلنا لآخر نقطة وعندي أنه أهم نقطة ! اللي هي نظافة الرجلين :

ضروري تغسلينه ب أي صابون معقم سواءً لايف بوي و ديتول كله واحد اهم شي تنظفين رجلينك كويس عشان تتجنبين اي ريحة مزعجة ممكن تطلع ! وفيه منتجات بسيطة راح يساعدونك ب انك تتجنبين اي مشكلة بسيطة ! 

 اول شيء صابون منظف بعدين الترطيب ! 

انا استخدم صابون ديتول الازرق : 

إذا استخدمته ينظف من قلب صراحة واحس رجليني نظفت بجد ! وتشيل البكتيريا الموجودة بالرجل بعد استخدام الجزمات لوقت طويل مثل المدرسة وغيرة ! بعد ماحسيت انهم نظفوا ارطبهم بمرطب قوي سواءً كان نيفيا او جليسوليد او الفازلين كلهم ممتازين !

نيفيا او جليسوليد او زيوت جونسون كلهم ممتازين سواءً بالترطيب او بالريحه او بالنعومة بس قوامهم ثقيل شوي ويبي وقت على ماتمتصة الرجل افضل وقت إني استخدمهم قبل النوم  يصير فيه ترطيب كافي ب إني اقوم وألقى رجليني مترطبة وناعمه وريحتهم كويسة !  او بعد مقشر رجلين قوي ممكن يساعد على أن الرجل تترطب بدال ماتصير جافه ! 

فيه حركة اسويه انا مع اللوشنات اللي فيها ريحه جميلة سواءً جرجنز او لوشنات باث اند بودي ووركس ، بما ان ترطيبهم مو عميق ولايبقى ! احط شوي منه مع نيفيا او جليسوليد منه يعطي ريحه جميلة ونظيفة ومنه يرطب ويكون ترطيبة قوي وعميق! 

او تستخدمين جل زي هذا ماادري إذا كان معروف او لا بس انا استخدمه من أيام الإبتدائي وللحين استخدمه مره كويس هو عبارة عن جل وله ريحة زي اي جل بس هذا له اكثر من استخدام : ينفع بعد ماتلبسين ملابسك الداخلية وتحطين شوي منه على الملابس يعطي ريحة جميلة وثابته ومره ممتاز انصح فيه .

ممكن تستخدمينه مع نيفيا و جليسوليد وتحطينهم سواءً على رجلينك او جسمك مره ممتاز والريحة جميلة بجد .

وممكن تحطين شوي منه بعلبة بخاخ فاضيه وتزودين عليه مويا ويصير معطر للغرفة وللمفرش انا اسوي الحركه هذي ووممتازة ! فيه له أكثر من شكل فيه بالليمون وبالزهور والفواكه وبالعود وغيره .

سعره 8 ريال !

والحمدلله خلصت تدوينه اليوم أن شاءالله استفدتوا وسامحوني على التقصير ، بس في أشياء او ظروف تخلينا ننشغل شوي ! 

وشكراً جزيلاً الصراحة ماتوقعت العدد يزود إن شاءالله ابحاول قد ماأقدر إني أجهز للتدوينة اللي بعده وإني ما أتأخر ، وهذي حساباتي زي ماقلت لكم فوق :

Twitter , instagram , snap : looysh_18

Ask.fm : looysh 

طيب فيه نقطة حابة اقولكم عليه ، فيه جميلة اسمه آلاء تنزل اكلات سريعة ومشروبات على اليوتيوب ، انا صراحة يعجبني شغلها وعن تجربة شخصياً مشروباته الشتوية او اكلاته السريعه وخفيفة وتنفع للجوع اللي يطلع آخر الليل انصحكم تشوفونه وتجربونه وحساباته راح احطهم تحت .

Twitter , Instagram : iberryki

you tube : iberryki

وبس ومره ثانيه شكرا لأنكم وصلتوني 115,100 مشاهدة ماتدرون قد ايش فرحت بعدد المشاهدات وقد ايش يفرحني اضافتكم لي بالسناب والتويتر والانستقرام وردودكم بعد شكرا قوه ربي يسعدكم ويخليكم  ♥♥

وشكراً لكل من شجعني سواءً من اهلي ، وصديقاتي ، والناس الجميلة اللي تعرفت عليها ♥♥

مع السلامة ♥♥